في رحلتي الأخيره لقطر، سنحت لي الفرصه بمشاهده فلم The Kingdom

الفلم يتحدث عن تفجيرات حدثت في الرياض في مجمع سكني اغلبيه سكانه من الجنسيه الأمريكية ، وتحاول مجموعه من الـ FBI في امريكا ان تأتي الى المملكه العربيه السعوديه لتحقيق عن هذا الوضع بمساعده عناصر الأمن السعوديه و تحاول عناصر الأمن السعوديه التشديد على العناصر الأمريكيه ليبينوا لهم انهم من يسيطر على الوضع ..

والجميل في الفلم بأنه منطقي لحد كبير ومنصف ايضاً للطرفين (الأمريكي والسعودي) بحيث ان هناك فئه ضاله وفئه صالحه ..

ومع تسارع الأحداث في الفلم تتحول عنصر الشده للفريق الأمريكي الى منحى التعاون والصداقه فيما بينهم للدفاع عن الأخر ..

والملفت للنظر ان جميع التفاصيل التي صورت كالبذل العسكريه و الطرق السريعه كانت مشابهه الي حد كبير ، وعلماً بأن احداث الفلم صورت في ابو ظبي ..

انصح الجميع بمشاهدته ، فعلاً فلم اكثر من رائع ومنطقي بدرجه كبيره ..

(أظغط للتكبير)
 
هالصوره في الرحله الأخيره لقطر في سوق واقف الغني بالمناظر المعماريه ..

انصح من سيذهب الي قطر لزياره هالسوق الجميل ..

اتمنى ان تحوز الصوره على رضاكم ..

يزيد ..

كما وعدتكم في البوست اللي قبل، بأني راح اكتب تقرير بسيط عن قطر .. ورحلتي لقطر
ً

يوم الأثنين في الساعه ١١ ظهراً شدينا الرحال الى قطر بموتري الحبيب ( طبعاً من بعد ما مرينا دانكن دونتس للتزود بالقهوه !! ) وهي المره الثانيه لي اني ارح قطر

كان الهدف من روحتنا لقطر هي توصيل اعمال مجموعه من المصورين للجمعيه القطريه للمشاركه في مسابقه آل ثاني للتصوير الفوتوغرافي + نوسع صدورنا

وكانت الوجهه الى الخبر لمقابلة بعض الشباب لأستلام اعمالهم و الغداء وبعدها ننطلق الى الخبر ..

وصلنا في تمام الساعه ٢:٣٠ ظهراً الى كورنيش الخبر وقعدنا نستنى الشباب لين ما يصولون وكالعاده تأخروا وقررنا اننا نتغدى في فرايديز < ----- هو اللي قرر بالأصح !

وحنا في السياره ننتظر الشباب وننتظر فرايديز يفتح قعدت اناظر استمارة السياره الا اثاريها منتهيه من شهرين !

طبعاً الشباب بغوا يطقوني طق لكن اله ستر واللي ساعدني ان الشباب وصلوا في ذيك اللحظه

تغدينا وقعدنا نفكر شلون نكمل المسيره لقطر <--- احلى يا مسيره !! :D، كان الأتفاق النهائي اننا نستأجر سياره ونشد الرحال لقطر .. قعدنا ندور حول مكاتب التأجير وما فيه احد ساعدنا بخصوص التفويض لخروج السياره الى قطر ! فا قعدنا نحسبها وكلمت على الوالد الله يطول بعمره قالي ما عليكم من الأستماره و توكلوا على الله وامسكوا الطريق وفعلاً كلمت الشباب وقالوا ما عندهم مانع ، وفي الساعه الـ ٨:١٥ قررنا اننا نواصل لقطر واللي يصير يصير ولما وصلنا منفذ سلوى كنا في اشد حالة خوف ! دخلنا المنفذ وعند اول شباك كان يبي الجوازات ووثيقة ملكيه السياره عطيتهم اياها وقالي : انت اول مره تطلع برا بهالسياره قلت له ايه ، وقلت في نفسي اكيد الحين بيطلب الأستماره ! الا وشوي يطقطق على الكيبورد ويعطيني الورقه ويقولي .............. (المزيد…)

يوم الأثنين اللي فات مشيت انا واثنين من الشباب لـقطر

وكانت “خطافيه” مره وما امداني اكتب لكم اني مشيت، حتى في قطر ما امداني برضوا

لكن رجعنا بحمد الله

وفيه بوست ثاني ان شاء الله شرح مبسط عن الرحله

يزيد ،،

الكروكي

عن نفسي راح اكون متواجد ان شاء الله ..

اتمنى من الجميع التواجد للتعارف واللقاء

يزيد ،،

اعلنت كانون بأصدار عدستين تيلو فوتو من العيار الثقيل ..

الأولى هي : Canon 200mm f/2L IS USM

من بعد ما كان اصدار Canon 200mm f/2.8L USM والتي توقف انتاجها سنه 2004 تأتي هذه العدسه الجديده واللي شكلها راح تكسر السوق ..

ما فيه سعر لها الى الأن …

والثانيه Canon 800mm f/5.6L IS USM ( )

هذي العدسه اللي انا متأكد مليون في الميه بأنها راح تكون حلم لكل مصور wild life !

والى الأن ما فيه سعر لهالعدسه ..

وطبعاً الى الأن العدسات ما تصنعت ولسه قيد التطوير وفي انتظار نيل موافقه Federal Communications Commission

المصدر

هذي دعايه شفتها في اليوتيوب لواحد متضرر من الأب ديت اللي سوته Apple ولكن مُصّر ان الـ iPhone مفيد وحتى هو مجرد Paper clip !

لا يفوتكم الفديو ..

كنت اتصفح جريده الرياض كالعاده …

ولقيت في قسم الأخيره صوره عن الأمباير ستيت وهي باللون الأخضر وكتب الخبر بأنها تحتفل بمناسبه عيد الفطر ..

فدخلت للموقع الرئيسي لمبنى الأمباير ستيت لأتأكد، وفعلاً لقيت انهم حاطينها بسبه هالمناسبه ..

ودخلت وسجلت معهم في المنتدى وحطيت خطاب شكر للمسؤلين عن الأمباير ستيت ..

كل الشكر للمسؤلين للأحتفال مع مناسباتنا …

وأتمنى لو كل واحد يسجل هناك ويحط لو كلمه شكراً ويكتب تحتها انه من السعوديه ..

المنتدى الخاص بالأمباير ستيت

تحياتي ،،

كل عام وشفاهكم لا تكفُ عن الأبتسامه ..

هذي العباره اللي حبيت اعايد فيها الجميع ..

عيد سعيد ان شاء الله للجميع ..

وان شاء الله بعد العيد راح يرجع نشاط المدونه بأذن الله

تحياتي للجميع وكل الشكر لمن سئل عني وعن حال المدونه ..

يزيد ..